24-12-2024
24 dekabr 2024-cü il tarixində Bakı Qızlar Universitetində Tələbə Gənclər Təşkilatının təşkilatçılığı ilə “Həmrəylik Gücümüzdür” adlı Yeni İl şənliyi keçirildi. Tədbir Azərbaycan Respublikasının Dövlət Himninin səsləndirilməsi ilə başladı. Daha sonra Bakı Qızlar Universitetinin rektoru, pedaqogika üzrə fəlsəfə doktoru, professor Sevinc Rəhimova açılış nitqi ilə çıxış edərək tədbir iştirakçılarını Dünya Azərbaycanlılarının Həmrəyliyi Günü və qarşıdan gələn Yeni İl münasibətilə təbrik etdi.
Tədbirin bədii hissəsi tələbələrin hazırladığı “Azərbaycan - dünyam mənim” adlı ədəbi-bədii kompozisiya ilə açıldı. Ardınca universitetin xor kollektivinin ifasında səsləndirilən “Azərbaycan” musiqisi səsləndirildi.
Bayramın simvolik obrazları olan Şaxta Baba və Qar Qızın səhnəyə gəlişi iştirakçılar tərəfindən böyük coşqu ilə qarşılandı. Təşkil olunan əyləncəli oyunlar, xüsusilə “Torbadan suallar” adlı interaktiv tədbir tələbələrin böyük marağına səbəb oldu.
Daha sonra Tələbə Gənclər Təşkilatının sədri Aydan Mahmudova və Sosial-pedaqoji fakültənin sədri Səma Əsgərova tələbələrin iştirakı ilə hazırlanmış rəqs fləşmobunu təqdim etdilər.
Proqram Sosial-pedaqoji fakültənin tələbəsi Leyla Fətəliyevanın “Yeni İl gəldi” adlı solo ifası ilə davam etdi. Filologiya-tarix fakültəsinin tələbələri Aygün Atayeva və Arzu Tahirova tərəfindən Mirzə Fətəli Axundzadənin “Hekayəti Müsyö Jordan Həkimi-Nəbatat və Dərviş Məstəli Şah” əsərinin səhnələşdirilmiş bir parçası ingilis dilində təqdim edildi.
Tədbirin sonunda Şaxta Baba və Qar Qız tələbələrə Yeni İl arzularını çatdırdılar. Tədbir xor kollektivinin ifasında səsləndirilən musiqi ilə 2025-ci ilə geri sayımın edilməsi ilə başa çatdı.
Bakı Qızlar Universiteti kollektivi hər kəsi Yeni İl münasibətilə təbrik edir, yeni ildə sağlamlıq, xoşbəxtlik və böyük uğurlar arzulayır.
