02-04-2025

Pedaqogika kafedrasının əməkdaşları “Məktəbəqədər təhsil” ixtisası üzrə təcrübəçi tələbələrlə görüş keçirdi

Bakı Qızlar Universitetinin “Pedaqogika” kafedrasının müdiri dosent Həsən Bayramov, “Məktəbəqədər təhsil” ixtisası üzrə təcrübə rəhbəri Nuranə Əliyeva, kafedranın müəllimləri, pedaqoq-metodistlər Sara Bayramova, Gülşən Eminova, Əlibala Zalov, Gülnar Əlizadə, Təranə Piriyeva və digər əməkdaşlar 13, 158, 240  və 18 saylı məktəblərdə, həmçinin “Qərənfil” körpələr evi-uşaq bağçasında, 132 və 182 saylı bagçalarda  təcrübəçi tələbələrlə görüş keçirmişlər.

Görüş zamanı icmalın mərhələli yazılışı, diqqət yetirilməsi vacib olan məsələlər, sinif daxilində təlimə əsaslanan oyunların təşkili müzakirə olunmuşdur. Tələbələrin sınaq dərsləri dinlənilmiş, dərslərin tədris prosesinin tələblərinə uyğun keçirildiyi, müasir təlim metodlarından və əyani vəsaitlərdən istifadə olunduğu qeyd edilmişdir. Tələbələrin fəaliyyətləri qiymətləndirilmiş və müvafiq tövsiyələr verilmişdir.

Məktəbəqədər təhsil müəssisələrində həyata keçirilən tərbiyəvi işlər çərçivəsində tələbələr aktiv pedaqoji fəaliyyətə cəlb olunmuş, onların sahəvi bilik və bacarıqlarının inkişaf etdirilməsi, nəzəri biliklərin praktikada tətbiqinin təkmilləşdirilməsi və gələcək kadr hazırlığı prosesinə töhfə verilməsi məqsədilə müvafiq tədbirlər həyata keçirilmişdir.

Bununla yanaşı, pedaqoji heyət tələbələrə məktəbəqədər təhsil müəssisələrində tədrisin keyfiyyətinin artırılması, innovativ metodların tətbiqi və müasir pedaqoji texnologiyalardan istifadənin əhəmiyyəti barədə ətraflı məlumat vermişdir. Tələbələr üçün təşkil olunan görüşlər çərçivəsində onları maraqlandıran suallar cavablandırılmış, pedaqoji prosesin effektiv təşkili ilə bağlı praktik tövsiyələr verilmişdir.