Şıxaliyeva Aynur Seyfəli qızı
Psixologiya ixtisası üzrə 2018-ci il məzunu
Bakı Qızlar Universitetini ilk bitirdiyim zamanlarda bəlkə bunun heç fərqində deyildim. Ancaq sonrakı illərdə həm digər universitetlərlə müqayisə etdiyimdə, həm də iş fəaliyyətimdə bu universitetin, sevimli müəllimlərimin mənim həyatımda nə qədər böyük rol oynadığının fərqinə vardım. Müəllimlərimiz tək nəzəri deyil, həm də praktik biliklərini bizimlə heç tərəddüd etmədən paylaşıb , bizi doğrudan da bir peşəkar kimi yetişdiriblər. Bu gün Universitetə gəlmə səbəbim Türkiyədə magistr təhsili almağımla bağlıdır. Hər mərtəbəni qalxdıqca sevimli müəllimlərimin çoxunu görüb kövrəldim. Ulduz müəllimə, Sədaqət müəllimə, Məhərrəm müəllim, sizi görmək çox xoş oldu. Bu gün mənim üçün müsbət emosiyalarla dolu oldu.
Bütün universitet heyətinə uğurlar arzu edirəm. Yaxşı ki, bu universitetin məzunuyam.
Sevgilərlə,
Şıxaliyeva Aynur
19.01.2024
Qənbərli Ülviyyə Qabil qızı
Bakı Qızlar Universitetinin “Azərbaycan dili və ədəbiyyatı müəllimliyi” ixtisasının 2023-cü il məzunu
Bakı Qızlar Universitetinin təhsil həyatımda çox böyük rolu oldu. Bu təhsil həyatında hər zaman bütün çətinliklərdə bizə dəstək olan Bakı Qızlar Universitetinin əziz və dəyərli müəllimlərinə təşəkkür edirəm.
İmza: Ü. Q. Qənbərli 26.01.2024
Yeganə İsmayılova
Bakı Qızlar Universitetinin “Pedaqogika və psixologiya” ixtisasının 2024-cü il məzunu
Yaşadığım şəhərdən Bakıya gələndə universitet haqqında heç bir məlumatım yox idi. Həmin dövrdə açılmış bir ali məktəb olduğu üçün insanlar arasında çox tanınmırdı. İxtisasım haqqında geniş məlumatım olmadığı üçün müxtəlif fikirlər bizi ruhdan salırdı. Zaman keçdikcə, təhsil aldıqca fikirlərim dəyişdi. İxtisasımın nə qədər maraqlı olduğunu gördüm. Dərslərdə böyük həvəslə iştirak edirdim. Müəllimlərimin dəstəyi ilə ali təhsilimi davam etdirmək qərarına gəldim. 2005-ci ildə Şəki şəhər 1 nli orta məktəbdə praktik psixoloq kimi fəaliyyətə başladım.
Təhsilimi davam etdirmək məqsədilə Hacettəpə Universitetinin “Klinik psixologiya ” ixtisasına qəbul oldum. İkinci kursdan universitetin klinikasında assistent olaraq çalışmağa başladım.
Oxuduğum müddətdə öncədən təhsil aldığım ali məktəbin təhsil keyfiyyətinin yüksək olduğunu düşünürdüm. Baza təhsilimin nə qədər keyfiyyətli olduğunu anladım.
Bakırköy “Ruh və sınır hastalıkları” xəstəxanasında klinik psixoloq olaraq fəaliyyət göstərmişəm. Təqaüdlə oxuduğum üçün vətənə geri döndüm. Daha sonra tibb mərkəzində Autizm şöbəsində proqramçı və qrup rəhbəri oldum.
Daha sonra Loqos PNİM-də baş psixoloq olaraq fəaliyyətimi davam etdirdim. Çalışdığım müddətdə klinik psixologiya üzrə magistr təhsilimi İstanbul Okan Universitetində davam etdirdim. Hal-hazırda Elpida Psixoloji Mərkəzinin və Elpida uşaq bağçasının təsisçi direktoruyam və fəaliyyətimi klinik psixoloq olaraq davam etdirirəm.
Hörmətlə: Yeganə İsmayılova
Bunun üçün öz müəllimlərimə və Bakı Qızlar Universitetinə təşəkkür edirəm!
Mənsurə Yusifova
Bakı Qızlar Universitetinin “Pedaqogika və psixologiya” ixtisasının 2004-cü il məzunu
Qəbul olduğumuz ildə Unversitetlə bağlı heç bir məlumatımız yox idi. Fəqət sonra bir çox universitetdən müsbət keyfiyyəti ilə seçildiyinin şahidi olduq.
Müəllimlərimiz və rəhbərlik bizə böyük qayğı ilə yanaşır, heç bir qarşılıq gözləmədən təhsil almağımız və hərtərəfli inkişaf etmiş bir mütəxəssis olaraq yetişməyimiz üçün hər cür şəraiti yaradırdılar. O dövr üçün bu yenilik idi. Universitetdə oxuduğumuz illərdə elmi konfranslarda iştirak edirdik, məqalələrimiz universitet daxilində nəşr olunurdu.
Ali məktəbi bitirdikdən sonra Laçın rayonu Biləcəri ümumi orta məktəbində praktik psixoloq olaraq fəaliyyətə başladım. 2018-2020-ci illərdə “Məktəbdə psixoloji xidmət və onun əsasları” adlı kitabım nəşr edildi. Qrand layihələrdə təlimçi psixoloq kimi fəaliyyət göstərmişəm.
Hal -hazırda Elpida Psixoloji və Nitq mərkəzində uşaq və yeniyetmə psixoloqu, refleksoloq olaraq fəaliyyət göstərirəm. Eyni zamanda təlimçilik fəaliyyətimi də davam etdirirəm.
Çox böyük hörmətlə: Mənsurə Yusifova
Musayeva Nərmin Əsəd qızı
Bakı Qızlar Universitetinin “Filologiya-tarix ” fakültəsinin 2008-ci il məzunu
Həyatın hər səhifəsi bir maraq, bir həyəcan, ümid dolu gəcəyə açılan bir pəncərədir. Bu səhifələrdən mənim kimi tələbəlik həyatına qədəm qoyan bir çox insan üçün həsrətlə gözlənilən gün-15 sentyabr 2003-cü il idi. Hər birimiz bizi gözləyən yeni həyatdan, mühitdən xəbərsiz səhəri diri gözlərlə açmışdıq. O gündən sonrakı 5 il ərzində olan xatirələrimi bölüşmək istəyirəm.
Bir qədər əvvələ qayıdıram. İmtahanlarımızı vermişdik, ərizə yazmaq üçün “Abituriyent” jurnalının yeni nəşrini əldə etdik, jurnalın sonuncu vərəqlərində universitetlər haqqında məlumatlar əks olunmuşdu. Niyəsə mən tərəddüd etmədən jurnala ilk baxışımdan “Ata, mən Qızlar Seminariyasında oxumaq istəyirəm”, -dedim. Atam qərarımla razılaşdı. Bie neçə gün sonra nəticələr elan olundu, mən arzuma çatmışdım. Bakı Ali Pedaqoji Qızlar Seminariyası “ Azərbaycan dili və ədəbiyyat” ixtisasına qəbul olunmuşdum.
O gün gəldi artıq, bir neçə gün əvvəldən seçilmiş geyimimiz, çantamız, valideynimizlə universitetə yollandıq. Hamı həyətdə gözləyirdi, tələbələrin gözlərində həyəcan, sual, valideynlərində sevinc dolu narahatlıq sezilirdi. Beləcə ilk dərs günümüz başladı.
Mən müasir dünyanın heç bir pis niyyətinin qapının kandarından gəlməyə icazə verməyən sehirli aləmə gəlmişdim. Müəllimlərin geyimi, davranışı, dəhlizdəki xanım-xatun tələbələr-ətrafdakı hər şey seçimimin doğru olduğunu göstərirdi.
Beləcə biz dərslərə başladıq, bu dərslər aldığı məvacibin haqqını verən müəllimlər tərəfindən tədris olunurdu. Burada ancaq bir məqsədimiz vardı-oxumaq, çünki bu diplom ala bilməyimiz üçün yeganə yol idi.
Mən çox həvəslə oxuyurdum, adlarını, jest və mimikalarını unutmadığım müəllimlərim bizi səylə müəllim kimi yetişdirirdi. Bizim boşa gedən tək bir anımız yox idi.
Ailə vəziyyətimlə əlaqədar 3-cü kursdan etibarən təhsilimi qiyabi davam etdirməli oldum. Bu zaman Havva xanım Abdullayevanın atama dediyi xoş sözlər hələ də yadımdadır. Qiyabi təhsilimə davam etdiyim gündən 3-cü kursdan Şəki şəhər 5 nömrəli tam orta məktəbdə işləməyə başladım, amma mən bircə gün də özümü tələbə hiss etmədim, nə qədər çox biligilər aldığımızı gördüm, hər seminarın, mühazirənin bizdə necə təcrübəyə çevrilən nəzəri biliklərdən ibarət olduğunu gördüm.
Mən hər bir güşəsi təhsil, əxlaq prinsiplərini özündə əks etdirən universitetimi 2008-ci ildə fərqlənmə diplomu ilə bitirdim. Aldığım hər bir qiymət yuxusuz gecələr, zəhmət, obyektiv keçirilən imtahanlar, insana ümid verən əsl müəllimlərin sayəsində idi. Bu uğur məni tərk etmədi. Müəllim olmağı çox sevdim, şagirdlərim mənə gülən simalar mənə mayak oldu.
2013-cü ildən etibarın Azərbaycan Respublikası Elm və Təhsil Nazirliyinin sifarişi ilə respublikanın bir çox bölgəsində layihələri gerçəkləşdirən Təhsildə İnnovativ Texnologiyalar əlavə təhsil mərkəzinin təlimçisi kimi işlməyə başladım. “Yeni fənn kurikulumlarının tətbiqi”, “Həmkara dəstək”, “İntel-gələcək üçün təhsil”, MTMB, Hibrid öyrənmə, Onlayn ünsiyyət və s kimi layihələrdə təlimçi olaraq fəaliyyət göstərdim, respublikamızın fərqli bölgələrindən olan onlarla müəllimlərə təhsildəki yeni texnologiyaların öyrənilməsində dəstək oldum.
2014-cü ildə Azərbaycan Respublikası Elm və Təhsil Nazirliyi tərəfindən keçirilən “Elektron Təhsil Müsabiqəsi” də 2-ci yerin qalibi oldum.
2014-2015-ci ildə keçirilmiş müsabiqədə cənab Prezident İlham Əliyevin sərəncamı ilə “Ən yaxşı müəllim” adına layiq görüldüm.
2015-ci ildə Azərbaycan Respublikası Elm və Təhsil Nazirliyi tərəfindən keçirilmiş “Gələcək-müəllimin əsəridir” adlı müsabiqənin qalibi olmuşam.
2015-ci ildə Azərbaycan Respublikası Həmkarlar İttifaqı Konfederasiyası tərəfindən “İlin peşəkar gənci” adına layiq görülmüşəm.
2014-2017-ci illər ərzində Dövlət İmtahan Mərkəzində ekspert müəllim olaraq işləmişəm.
Hal-hazırda Şəki şəhər 5 nömrəli tam orta məkətəbdə Azərbaycan dili və ədəbiyyat müəllimi və İTE Azərbaycan əlavə təhsil mərkəzində təlimçi olaraq işləyirəm.
Qazandığım bütün uğurların arxasında qazandığım biliklər, sağlam universitet mühiti dayanırdı. Mən ömrümün sonuna qədər mənə bunları bəxş edən müəllimlərimi unuda bilmərəm.
Bizə hər bir sahədə nümunəvi olan, səhv etməməyimiz üçün əlindən gələni əsirgəməyən, həm yaxşı insan, əxlaqi dəyərləri yüksək müəllim kimi yetişməyizimdə çox böyük rolu olan Havva xanım Abdullayeva,
Çöhrəsində gülüşün əlamətini görməyin yeganə yolunun yaxşı oxumaq olduğunu bildiyim İradə xanım Musayeva,
Yaxşı Azərbaycan dili müəllimi olmağımda əvəzsiz rolu olan Almaz xanım Hüseynova !
Adını çəkə bilmədiyim bütün müəllimlərim, biz sizin işığınızdan bəhrələndik.. Əminəm ki, bu universitet Azərbaycan üçün hələ çox dəyərli pedaqoqlar yetişdirəcək.
Hörmətlə: Nərmin Musayeva
Ovçuyeva (Mikayılova) Vüsalə Bədrəddin qızı
Bakı Qızlar Universitetinin 2007-ci il məzunu
Doğma məkan, Bakı Qızlar Universiteti , bugünkü bütün uğurlarımın vəsiləsi!
Hörmətli müəllimlərim, sizlərə nə yazsam da üzərimdə olan haqqınızı ödəməz. Bu gün məktəb direktoru vəzifəsində işləyirəm. İstər müəllim, istərsə də direktor kimi iddialı olmağımı Bakı Qızlar Universitetinin mənə verdiyi təhsilə, özgüvənə borcluyam. Qəlbimə qızıl hərflərlə yazılmış təhsil ocağım, düzünü etiraf edim ki, qəbul olduğum zaman niyə özəl universitetə düşdüyüm üçün çox təəssüflənmişdim. Amma qısa müddətdə universitetin daxilindəki nizam-intizama sözün həqiqi mənasında heyran oldum. Təlimdəki ciddi nəzarətdən daha danışmıram heç. Bu cür ciddiyyət olan yerdə mükəmməl nəticələr əldə etməmək mümkün deyil . Universitet məzunlarının bu gün müxtəlif vəzifələrdə çalışması , işini layiqli icra etməsi də bütün bunlara bariz nümunədir. Mən öz adımdan universitetin rəhbər heyətinə, bizlərə ciddi səylə elm öyrədən müəllimlərimizə minnətdarlığımı bildirirəm. Var olun ! Mən qürur duyuram ki, Bakı Qızlar Universitetinin məzunuyam.
Hörmətlə: Ovçuyeva Vüsalə
Dibirova Züleyxa Cavad qızı
Bakı Qızlar Univeristetinin 2005-ci il məzunu
10 ildir ki, Balakən rayonunun ən böyük məktəbəqədər təhsil müəssisəsinin rəhbəriyəm. İşimdə və həyatımda qazandığım uğurlarda Bakı Qızlar Universitetinin çox böyük rolu vardır.
Bu ali təhsil ocağının bir məzunu olaraq onu deyə bilərəm ki, burada yaradılan mühit, qurulan tələbə-müəllim münasibətləri çox fərqlidir. Bu atmosferi yaratmaq, tələbəyə ixtisasını ən yüksək səviyyədə mənimsətməklə yanaşı, Azərbaycan qadınına milli ruhu, Azərbaycan dilini, adət-ənənələrini, mənəvi dəyərlərin istənilən maddiyatdan yüksəkdə durduğunu layiqincə aşılaya bilmək hər rəhbərliyin, hər müəllim kollektivinin işi deyil. Bunu ancaq xalqını ürəkdən sevən, tələbələrini Azərbaycanın gələcəyi olaraq görən bir komanda edə bilər. Universitetin bu gün də, öz fəaliyyətini uğurla davam etdirməsi məhz bu meyarları əsas tutmasıdır.
Bakı Qızlar Universitetini bitirməyimdən 18 il keçib. Bu gün hər bir müəllimimi çox böyük hörmətlə xatırlayıram. Çünki onların hamısı əsl Azərbaycan müəllimi nümunəsidir. Başda hörmətli rektorumuz Ağarəhim Rəhimov, prorektor Nazim Abbasov, dekanımız Havva Abdullayeva, çox hörmətli müəllimlərim Afat Qurbanov, İradə Musayeva, Gülxanım Vəliyeva, Tofiq Hüseynoğlu, Nazif Qəhrəmanlı kimi insanların “məktəbində” tələbə olmaq, onların mühazirələrini dinləmək böyük şansdır. Azərbaycanda belə bir təhsil ocağının olması, gələcəyin memarları olan müəllimlərin belə bir şəraitdə yetişməsi Azərbaycan təhsilinin uğurlu gələcəyindən xəbər verir.
Hörmətlə : Dibirova Züleyxa 18.01.2024 –cü il
Yarməmmədova Fəridə Arif qızı
Bakı Qızlar Universitetinin 2019-cu il məzunu
2019-cu ildə Xarici dil müəllimliyi ixtisası üzrə məzun olmuşam. Bu universitet mənim karyera həyatımın ilk bünövrəsi oldu. Hal-hazırda Cambridge dil mərkəzinin rəsmi müəlliməsi kimi çalışıram, həm də beynəlxalq dil imtahanlarına hazırlaşıram. C2 səviyyə ingilis dili sertifikatım var. Bu gün bu nailiyyətləri əldə etmişəmsə hamısı burda aldığım bilik- bacarıqlar sayəsində olub. Yenidən universitet seçimi imkanım olsaydı, bir daha bu universiteti seçərdim. Məni belə savadlı kadr kimi yetişdirdiyiniz üçün çox sağ olun.
Hörmətlə Yarməmmədova Fəridə
07.03.2024
İsmayılova Aygün Nazim qızı
Bakı Qızlar Universitetinin 2008-ci il məzunu
Mən 2008-ci ildə Xarici dil müəllimliyi ixtisasından məzun olmuşam. Bu universitet mənim karyera həyatıma müsbət təsir göstərib. Universiteti bitirdikdən sonra müxtəlif qabaqcıl kurslarda ingilis dili müəllimi kimi çalışmışam. Eyni zamanda 2008-ci ildən bəri repetitorluq fəaliyyəti ilə məşğul oluram. Hazırda Sabunçu rayonu Pirşağı qəsəbəsi 10 saylı sanatoriya tipli internat məktəbində tərbiyəçi- müəllim vəsifəsində çalışıram. Burada işləyib şagirdlərə faydalı olduğum üçün çox şadam. Bu günə qədər qazandığım bütün uğurlara görə məzun olduğum universitetə təşəkkürümü bildirirəm. Çünki mənim gələcək nəsillərin təlim -tərbiyəsində , təhsilində, onların gələcək həyatında təsirim varsa, bunun üçün mənə təhsil verən universitetə borcluyam.
P.S. Qeyd etməyi lazım bilirəm ki, hazırlaşdırdığım abituriyentlər yüksək ballarla universitetlərə qəbul olublar.
Hörmətlə İsmayılova Aygün
18.03.2024