01-11-2024
26 oktyabr 2024-cü il tarixində Bakı Qızlar Universitetində BQU-nun təsisçisi, tanınmış yazıçı-dramaturq, görkəmli alim və pedaqoq, professor Ağarəhim Rəhimovun doğum günü münasibətilə xüsusi tədbir keçirildi. Tədbirdə BQU-nun BQU-nun himni səsləndirildi.
Ağarəhim Rəhimovun yaradıcılığına həsr edilmiş tədbirdə, “Filologiya-Tarix” fakültəsinin tələbələri arasında intellektual oyun keçirildi. “Qasırğa”, “Şəfəq” və “Xəmsə” komandaları arasında baş tutan bu yarışmada qalib “Qasırğa” komandası oldu. Qalib komanda mükafatlandırılmaq üçün səhnəyə dəvət edildi və hədiyyələri şəxsən professor Ağarəhim Rəhimov təqdim etdi.
Daha sonra Bakı Qızlar Universitetinin tədris işləri üzrə prorektoru, professor Hava Abdullayeva , “Mətbuat və ictimaiyyətlə əlaqələr şöbəsi”nin rəhbəri Elmira Kənan, kafedra müdirləri və digər əməkdaşlar öz təbrik və ürək sözlərini səsləndirdilər.
Tədbirin davamında Ağarəhim Rəhimovun yaradıcılığına dair müzakirə zamanı “Kitab” diskusiya klubunun üzvləri professorla fəal dialoq qurdular. Suallara səmimi cavab verən prof.Ağarəhim Rəhimov tələbələrin müəllifin yaradıcılığına göstərdikləri marağı yüksək qiymətləndirdi. Prorektor Aygün Cəfərova isə tələbələrin sevdikləri əsərlərin müəllifi ilə görüşməsinin onlar üçün yaddaqalan tarixi anlardan olduğunu vurğuladı.
Tədbir böyük maraqla qarşılandı və sonda xatirə şəkilləri çəkildi.
