14-03-2024

BQU-da karyera mövzusunda təlim təşkil olunub

14 mart 2024-cü il tarixində Bakı Qızlar Universitetində “Karyera planlaması ” mövzusunda təlim keçirildi. 

Təlimdə  tədris işləri üzrə prorektor prof. Hava Abdullayeva giriş nitqi ilə çıxış etdi. O, universitetdə yaradılmış karyera şöbəsi və onun fəaliyyət istiqamətləri haqqında tələbələrə məlumat verdikdən sonra sözü Karyera bölməsinin rəhbəri və mütəxəssisi Ləman Mustafazadəyə  verdi. O, təqdimatında  Karyera bölməsinin  başlıca vəzifələrinin  tələbələrin şəxsi inkişafına , karyera yüksəlişinə, həmçinin, məşğulluğun tənzimlənməsinə  dəstək olmaq, onları peşəkar iş həyatına hazırlamaq və məzunlarla daima sağlam əlaqələri qorumaqdan ibarət olduğunu bildirdi.

 Daha sonra  Elektron Məlumatlar Sisteminin  bölmə rəhbəri Səyalə  İmanova çıxış edərək  karyera yolunda uğur qazanmağın yolunun ilk öncə özünütanımadan, daha sonra isə fəaliyyət planının  düzgün tərtib olunmasından keçdiyini tələbələrin diqqətinə çatdırdı. O, çıxışında fəaliyyət planının hazırlanması zamanı istifadə olunan üsul və vasitələrin əhəmiyyətini vurğulayaraq  nitqini Antuan de Sent-Ekzüperinin “The Little Prince” – “Balaca şahzadə“ hekayəsindən bir sitatla bitirdi:  

“A goal without a plan is just a wish”.  

Plansız bir məqsəd sadəcə  arzudur. 

 Ardınca Elektron Məlumatlar Sisteminin bölmə mütəxəssisi Xatirə Bəylərzadə  “Əmək bazarı nədir və karyera planlamasında bazar araşdırması niyə lazımdır” mövzusunu əhatə edən təqdimatla çıxış etdi. O, əmək bazarı, həmçinin bu bazara daxil olan işaxtaran və işəgötürənlərin yeri haqqında məlumat verərək texnoloji yeniliklərin, demoqrafik dəyişikliklərin, urbanizasiya və qloballaşmanın əmək bazarına təsirindən söz açdı. Karyera planlaması zamanı əmək bazarının araşdırılmasının zəruriliyini  qeyd etdi.

Təlimin sonunda tələbələri maraqlandıran suallara cavab verildi.